अभिनेत्री श्रद्धा कपूरच्या आगामी ‘ईंथा’ या चित्रपटाचा ट्रेलर प्रदर्शित झाला आहे. लावणी क्षेत्रातील प्रसिद्ध कलाकार ईंथा बाई यांच्या जीवन्यावर हा चित्रपट आधारित आहे. एका सामान्य महिलेने अनेक अडचणींचा सामना करत आपल्या कलेच्या जोरावर वेगळी ओळख कशी निर्माण केली, याची कथा या चित्रपटातून प्रेक्षकांना पाहायला मिळणार आहे. चित्रपटाच्या ट्रेलरमध्ये लावणीच्या रंगदार जगाची झलक दाखवण्यात आली आहे. संगीत, नृत्य, संघर्ष आणि भावनांनी भरलेला ईंथा बाईंचा प्रवास यात पाहायला मिळतो.
समाजातील परंपरांना आव्हान देत स्वतःच्या कलेच्या जोरावर यश मिळवणाऱ्या एका महिलेची ही प्रेरणादायी कहाणी आहे. आकर्षक दृश्ये, प्रभावी संगीत आणि दमदार अभिनय यामुळे चित्रपटाबद्दल प्रेक्षकांमध्ये उत्सुकता निर्माण झाली आहे.
चित्रपटाचे निर्माते दिनेश विजन यांनी सांगितले की, ‘ईंथा’ची कथा ऐकल्यानंतर ते खूप प्रभावित झाले. लावणीची कला, तिचे संगीत, ताल आणि या कलेला लोकप्रिय करणाऱ्या महिलांचा प्रवास त्यांना विशेष भावला. अशा सामान्य महिलांची कथा अधिकाधिक लोकांपर्यंत पोहोचली पाहिजे, असेही त्यांनी म्हटले. चित्रपटात ईंथा बाईंची भूमिका साकारणारी श्रद्धा कपूर म्हणाली की, ही एका अशा महिलेची कथा आहे, जिने आपली कला, धैर्य आणि वेगळ्या विचारामुळे स्वतःची ओळख निर्माण केली. या भूमिकेसाठी काम करताना तिला ईंथा बाईंच्या आयुष्याबद्दल अधिक जाणून घेण्याची संधी मिळाली. ही भूमिका साकारणे तिच्यासाठी विशेष अनुभव असल्याचेही तिने सांगितले. ‘छावा’ चित्रपटाच्या यशानंतर दिग्दर्शक लक्ष्मण उतेकर ‘ईंथा’च्या माध्यमातून प्रेक्षकांसमोर एक वेगळी कथा घेऊन येत आहेत. या चित्रपटाची निर्मिती दिनेश विजन आणि लक्ष्मण उतेकर यांनी केली आहे.
