पहिल्याच दिवशी तीन हजार अनुयायांनी स्वीकारला बुद्धधम्म

दीक्षाभूमीवर धम्मदीक्षेचा सोहळा

लोकवाहिनी न्यूज

नागपूर : महामानव डॉ. बाबासाहेब आंबेडकर यांच्या ऐतिहासिक धम्मक्रांतीची साक्ष देणाऱ्या पवित्र दीक्षाभूमीवर रविवारी पुन्हा एकदा ‘बुद्धं शरणं गच्छामि’चा मंगलघोष निमला. देशाच्या विविध भागोंतून आलेल्या हजारो उपासक-उपासिका आणि बौद्ध अनुयायांनी तथागत गौतम बुद्धांचा धम्म स्वीकारला. तीन दिवस चालणाऱ्या या सोहळ्याच्या पहिल्याच दिवशी सायंकाळपर्यंत सुमारे तीन हजार अनुयायांनी धम्मदीक्षा घेतली.

डॉ. बाबासाहेब आंबेडकर स्मारक समिती, दीक्षाभूमी आणि अखिल भारतीय भिक्खू संघाच्या संयुक्त सहकार्याने रविवारपासून तीन दिवसीय धम्मदीक्षा सोहळ्याला प्रारंभ झाला. दीक्षाभूमी स्मारक समितीचे अध्यक्ष तथा धम्मसेनानायक भदंत आर्य नागार्जुन सुरई ससाई यांनी सकाळी बुद्धवंदना घेऊन सोहळ्याची सुरुवात केली. डोक्यावर निळी टोपी, हातात पंचशील ध्वज आणि मनात तथागतांचा समता-करुणेचा संदेश घेऊन सकाळपासूनच अनुयायांची पावले दीक्षाभूमीकडे वळली. विविध राज्यांतून आलेल्या समूहांमुळे परिसरात धम्ममय वातावरण निर्माण झाले होते. भिक्खू संघाकडून दिवसभर धम्मदीक्षा देण्यात आली, यात त्रिशरण पंचशील आणि २२ प्रतिज्ञांचा समावेश होता. धम्मदीक्षा घेण्यात श्रामनेरांचाही समावेश होता. सायंकाळी सात वाजेपर्यंत सुमारे तीन हजार अनुयायांनी धम्माचा स्वीकार केला. त्यानंतर आवश्यक नोंदणी करून दीक्षादीक्षा प्रमाणपत्रांचे वाटप करण्यात आले.

सोहळ्यात भंते नागसेन, भंते प्रज्ञाबोधी, भंते धम्मविजय, भंते महानागा, भंते कुमारकश्यप, भंते धम्मप्रकाश, भंते नागप्रकाश, भंते नागानंद, भंते धम्मपाल, भंते बुद्धदीप, भंते कुशीनागा आणि भंते अनुत्तरबोधी यांच्यासह भिक्खू संघातील मान्यवर सहभागी झाले.

धम्मचक्र प्रवर्तन दिनाच्या मुख्य सोहळ्यासाठी दीक्षाभूमीकडे येणाऱ्या जनसागराचा ओघ वाढत असल्याने सोमवार आणि मंगळवारी धम्मदीक्षा घेणाऱ्यांची संख्या मोठ्या प्रमाणात वाढण्याची शक्यता भदंत ससाई यांनी व्यक्त केली.