चंद्रशेखर बावनकुळे यांची माहिती
लोकवाहिनी न्यूज
नागपूर : अमरावती विभाग शिक्षक मतदारसंघाच्या निवडणुकीत काँग्रेसला मतदान न केल्यास शिक्षकांना नोकरीतून काढण्याच्या धमक्या दिल्या जात असल्याच्या तक्रारी माझ्याकडे आल्या आहेत. या तक्रारींची योग्य वेळी चौकशी करण्यात येईल. शिक्षकांना धमकावून मतदान मिळवण्याचा प्रयत्न खपवून घेतला जाणार नाही, असा इशारा महसूलमंत्री तथा अमरावती जिल्ह्याचे पालकमंत्री चंद्रशेखर बावनकुळे यांनी सोमवारी प्रसारमाध्यमांशी बोलताना दिला.
शिक्षण संस्थांना सरकारकडून अनुदान मिळत असताना काही संस्थांमधील व्यक्तींकडून शिक्षकांवर दबाब टाकला जात असल्याचा आरोप बावनकुळे यांनी केला. शिक्षकांनी कोणत्याही धमकीला न घाबरता, पारदर्शकपणे आणि आपल्या इच्छेनुसार मतदान करावे. शिक्षकांवर अन्याय होऊ दिला जाणार नाही, असेही त्यांनी स्पष्ट केले
शिवाजी शिक्षण संस्थेबाबत भूमिका स्पष्ट करताना बावनकुळे म्हणाले, मी शिवाजी शिक्षण संस्थेचे नाव घेतले नव्हते. या संस्थेबद्दल मला पूर्ण आदर आहे, मी स्वतः या संस्थेचा विद्यार्थी आहे, संस्थेचे काम मोठे करण्यात आमचेही योगदान राहिलेले आहे. मात्र, संस्थेच्या पदाचा किंवा नावाचा राजकीय स्वार्थासाठी गैरवापर होत असेल, तर त्याला हमारा आक्षेप आहे.
महर्षी डॉ. पंजाबराव देशमुरु यांच्या नावाने ओळखल्या जाणाऱ्या या संस्थेने त्यांच्या आदर्शाचे पालन करावे, अशी अपेक्षा त्यांनी व्यक्त केली. संस्थेतील काही व्यक्ती काँग्रेसला मतदान करण्यासाठी शिक्षकांना धमकावत असल्याच्या तक्रारी आल्या असून, त्यांची चौकशी केली जाईल, असे त्यांनी सांगितले.
शिक्षकांना नोकरीतून काढण्याची धमकी देणे चुकीचे आहे. अशा प्रकरणांना संस्थेचा अधिकृत निर्णय समजू नये, संस्थेच्या नावाखाली काही व्यक्ती गैरवापर करत असतील, तर त्यांच्यावर कार्रवाई झाली पाहिजे. मी संस्थेचे नाव घेतले नसताना काँग्रेसचे प्रदेशाध्यक्ष हर्षवर्धन सपकाळ आणि हर्षवर्धन देशमुख यांना एवढे का लागले, असा प्रश्नही बावनकुळे यांनी उपस्थित केला.
नागपूर पदवीधर मतदारसंघासह महाराष्ट्रातील पाचही विधान परिषद जागांवर महायुतीचा विजय होईल, असा विश्वास बावनकुळे यांनी व्यक्त केला. ते म्हणाले, महायुती अत्यंत मजबूत आहे, पदवीधर मतदारांना सुधाकर कोहळे यांच्या माध्यमातून आपले प्रश्न सरकारपर्यंत पोहोचवतात येतील आणि ते सोडवले जातील, अशी अपेक्षा आहे. त्यामुळे नागपूर पदवीधर मतदारसंघात महायुतीचे उमेदवार सुधाकर कोहळे विजयी होतील.
यापूर्वीच्या निवडणुकीत संदीप जोशी यांना पराभूत करण्यासाठी सत्तेचा गैरवापर आणि जातीचे राजकारण करण्यात आल्याचा आरोप त्यांनी केला. मात्र, आपण सत्तेचा गैरवापर केला नसल्याचे सांगत यावेळी ही जागा महायुती जिंकेल, असा विश्वास त्यांनी व्यक्त केला.
मुख्यमंत्री देवेंद्र फडणवीस यांच्याबाबत काँग्रेस नेते सुनील केदार यांनी आक्षेपार्ह वक्तव्य केल्याच्या मुद्द्यावर बावनकुळे यांनी नाराजी व्यक्त केली. यासंदर्भात आपण पोलीस अधीक्षकांना माहिती दिल्याचे त्यांनी सांगितले.
संजय राऊत यांच्यावर टीका करताना बावनकुळे म्हणाले, संजय राऊत यांनी आपली उंची बघून बोलावे. देवेंद्र फडणवीस हे देशातील महत्त्वाच्या मुख्यमंत्र्यापैकी एक आहेत. त्यांना कोणाच्या प्रमाणपत्राची गरज नाही. राज्यातील जनतेने त्यांना स्वीकारले आहे, बोलण्याचे स्वातंत्र्य आहे म्हणून कोणावरही वाईट पद्धतीने बोलने योग्य नाही. जनता त्यांना योग्य धडा शिकवेल.
दुष्काळाच्या पार्श्वभूमीवर सरकारी योजनांना कात्री लावली जाणार का, या प्रश्नवर बावनकुळे म्हणाले की, कोणतीही योजना बंद केली जाणार नाही. मात्र, योजनांच्या अंमलबजावणीत आवश्यक सुधारणा करून अनावश्यक खर्च टळता येऊ शकतो. त्यातून वाचणारा निधी दुष्काळ निवारणासाठी वापरणे हा सरकारचा उद्देश आहे.
जनतेने चोरांना मतदान करणे बंद केले
राहुल गांधी यांनी केलेल्या मतचोरीच्या आरोपावर प्रतिक्रिया देताना बावनकुळे म्हणाले, या देशात मतचोरी होऊ शकत नाही. देशात निवडणूक प्रक्रिया पारदर्शकपणे पार पडते. जनतेने चोरांना मतदान करणे बंद केले आहे, हे त्यांनी तपासून पाहिले पाहिजे.
