लोकवाहिनी न्यूज
नागपूर : प्रख्यात बालरोगतज्ज्ञ तसेच महाराष्ट्र मेडिकल कौन्सिलचे अध्यक्ष डॉ. विंकी रघुवानी यांना वैद्यकीय सेवा, बालआरोग्य, वैद्यकीय नीतिमत्ता आणि सामाजिक कार्यातील उल्लेखनीय योगदानाबद्दल इंडियन मेडिकल असोसिएशन (आयएमए), नागपूरतर्फे प्रतिष्ठेचा ‘आयएमए रत्न’ पुरस्कार प्रदान करण्यात आला. आयएमए नागपूरच्या डॉक्टर्स डे निमित्त आयोजित विशेष कार्यक्रमात शहरातील अनेक मान्यवर डॉक्टरांसह त्यांचा गौरव करण्यात आला.
गेल्या तीन दशकांहून अधिक काळ डॉ. रघुवानी बालरोग क्षेत्रात कार्यरत असून बालआरोग्य सेवेसाठी त्यांच्या समर्पित कार्याची व्यापक दखल घेण्यात आली आहे. वैद्यकीय व्यवसायाबरोबर त्यांनी थॅलेसेमिया आणि सिकल सेल आजारांबात जनजागृती, तपासणी, लवकर निदान, समुपदेशन आणि रुग्ण सहाय्य उपक्रमांमध्ये मोलाची भूमिका बजावली आहे. थॅलेसेमिया अँड सिकल सेल सोसायटी ऑफ इंडिया तसेच विविध सार्वजनिक आरोग्य उपक्रमांच्या माध्यमातून त्यांनी विशेषतः वंचित घटकांतील हजारो रुग्ण आणि त्यांच्या कुटुंबांना मोठा आधार दिला आहे.
महाराष्ट्र मेडिकल कौन्सिलचे अध्यक्ष म्हणून डॉ. रघुवानी वैद्यकीय नीतिमत्तेला बळकटी देणे, डॉक्टरांसाठी सातत्यपूर्ण वैद्यकीय शिक्षणाला प्रोत्साहन देणे आणि आरोग्यसेवांमध्ये उत्तरदायित्व वाढविण्यासाठी सातत्याने कार्यरत आहेत. त्यांच्या नेतृत्वाखाली कौन्सिलने आरोग्यसेवेचा दर्जा उंचावणे, रुग्णांच्या हिताचे संरक्षण करणे आणि बदलत्या वैद्यकीय क्षेत्राशी सुसंगत अनेक महत्त्वपूर्ण उपक्रम राबविले आहेत.
पुरस्कार स्वीकारताना डॉ. रघुवानी यांनी आयएमए, आपल्या गुरुजनांचे, सहकारी डॉक्टरांचे, रुग्णांचे आणि कुटुंबियांचे मनःपूर्वक आभार मानले. हा पुरस्कार त्यांनी समाजाच्या सेवेसाठी अहोरात्र कार्य करणाऱ्या सर्व आरोग्यसेवकांना समर्पित करत, या सन्मानामुळे अधिक समर्पण, करुणा आणि वैद्यकीय नीतिमत्तेसह कार्य करण्याची प्रेरणा मिळाल्याचे सांगितले.
‘आयएमए रत्न’ पुरस्कार हा आयएमए नागपूरकडून दिला जाणारा सर्वोच्च सन्मानांपैकी एक असून वैद्यकीय विज्ञान, रुग्णसेवा, सार्वजनिक आरोग्य आणि मानवतावादी कार्यात उल्लेखनीय योगदान देणाऱ्या डॉक्टरांना प्रदान केला जातो. डॉ. रघुवानी यांना मिळालेला हा सन्मान त्यांच्या आजीवन सेवाभाव, वैद्यकीय उत्कृष्टता, नैतिक नेतृत्व आणि समाजाप्रती असलेल्या निःस्वार्थ योगदानाची गौरवपूर्ण पावती आहे.
