ब्रिगेडियर जनरल, कॅप्टनसह १२ जणांचा मृत्यू
लोकवाहिनी न्यूज
बेरूत : इस्रायलच्या सैन्याने दक्षिण लेबनॉनमध्ये हिजबुल्लाहच्या सुमारे १५० ठिकाणांवर भीषण हवाई हल्ले केले आहेत. मध्यस्थीच्या चर्चांना वेग आला असतानाही इस्रायलचे पंतप्रधान बेंजामिन नेतान्याहू माघार घेण्याच्या भूमिकेत नसल्याचे दिसत आहे. अमेरिकेच्या मध्यस्थीने झालेल्या चर्चेनंतर दोन्ही बाजूंमध्ये अटींसह युद्धविरामावर सहमती झाल्याच्या काही दिवसांतच दक्षिण लेबनॉनमध्ये झालेल्या इस्रायली हल्ल्यामध्ये किमान १२ जणांचा मृत्यू झाला आहे. मृतांमध्ये लेबनॉनच्या सैन्याचे वरिष्ठ अधिकारीही आहेत.
लेबनॉनच्या सैन्याने दिलेल्या माहितीनुसार, खारदाली-नबातियेह मार्गावर लष्करी वाहनावर इस्रायलने केलेल्या हल्ल्यात एका ब्रिगेडियर जनरल, एका कॅप्टन आणि एका सैनिकाचा मृत्यू झाला. दुसरीकडे, इस्रायली सैन्याने हा हल्ला “सक्रिय युद्धक्षेत्रात” करण्यात आल्याचे म्हटले आहे. लेबनॉनी सैन्याने आरोप केला की, इस्रायलकडून वारंवार आणि जाणीवपूर्वक केले जाणारे आक्रमण कोणत्याही शांततापूर्ण तोडग्यापर्यंत पोहोचण्याच्या सर्व प्रयत्नांना हाणून पाडण्याच्या उद्देशाने केले जात आहे.
लेबनॉनचे राष्ट्राध्यक्ष जोसेफ औन यांनी या हल्ल्याचा तीव्र निषेध करताना तो लेबनॉनच्या सार्वभौमत्वाचे तसेच आंतरराष्ट्रीय कायदे आणि नियमांचे गंभीर उल्लंघन असल्याचे म्हटले आहे. तसेच, लेबनॉनचे पंतप्रधान नवाफ सलाम यांनीही या कारवाईचा निषेध नोंदवला आहे. एका निवेदनात पंतप्रधान नवाफ सलाम यांनी ब्रिगेडियर जनरल वस्साम सबरा, कॅप्टन अली खौरी आणि सैनिक हुसेन गोजल यांच्या कुटुंबीयांप्रती तसेच लेबनॉनी सैन्याप्रती शोकसंवेदना व्यक्त केल्या आहेत.
यापूर्वी इस्रायलच्या हवाई दलाने लेबनॉनमधील पूर्वेकडील बेका खोरे आणि हिजबुल्लाहशी संबंधित इतर ठिकाणांवर हल्ले केले होते. इस्रायलचे पंतप्रधान बेंजामिन नेतान्याहू यांनी लेबनॉनमधील दहशतवादी गटांवरील कारवाई आणखी तीव्र करण्याचा निर्धार व्यक्त केला होता. नेतान्याहू यांची ही भूमिका अशा वेळी समोर आली होती, जेव्हा हिजबुल्लाहने अलीकडच्या आठवड्यांत दक्षिण लेबनॉन आणि उत्तर इस्रायलमधील इस्रायली सैन्याच्या ठिकाणांवर फायबर-ऑप्टिक तंत्रज्ञानयुक्त ड्रोनच्या साहाय्याने हल्ले केल्याचा दावा करण्यात आला होता.
