लोकवाहिनी न्यूज
पुणे : मुख्य निवडणूक आयुक्त ज्ञानेश कुमार यांच्या राजीनाम्याची आणि त्यांच्यावर कारवाईची मागणी करत काँग्रेसने सोमवारी पुण्यासह राज्यभर आंदोलन केले. मतदार यादीतील बदल आणि ‘व्होट चोरी’च्या आरोपांवरून काँग्रेसने निवडणूक आयोगाच्या कामकाजावर प्रश्न उपस्थित केले आहेत.
पुण्यात जिल्हाधिकारी कार्यालयाबाहेर काँग्रेसच्या वतीने आंदोलन करण्यात आले. या आंदोलनात पक्षाचे पदाधिकारी आणि कार्यकर्ते मोठ्या संख्येने सहभागी झाले होते. कार्यकर्त्यांनी घोषणाबाजी करत ज्ञानेश कुमार यांच्या राजीनाम्याची मागणी केली. काँग्रेसचे शहराध्यक्ष प्रशांत जगताप यांनी निवडणूक आयोगाच्या कामकाजावर टीका केली. मतदार यादीतून मोठ्या प्रमाणात नावे वगळण्यात आल्याचा आरोप त्यांनी केला. निवडणूक आयोगाच्या निर्णयांमुळे लोकशाही प्रक्रियेवर परिणाम होत असल्याचा दावा करत ज्ञानेश कुमार यांनी राजीनामा द्यावा, अशी मागणी त्यांनी केली. काँग्रेसने देशभरात मतदार यादीच्या विशेष सघन पुनरीक्षणाच्या (SIR) प्रक्रियेवरही आक्षेप घेतला आहे. पक्षाच्या म्हणण्यानुसार, या प्रक्रियेत मोठ्या संख्येने मतदारांची नावे वगळण्यात आली आहेत. या मुद्द्यावरून काँग्रेसने ज्ञानेश कुमार यांच्या राजीनाम्याची मागणी करत राज्यातील सर्व जिल्ह्यांमध्ये आंदोलन करण्याचे आवाहन केले होते. माजी शहराध्यक्ष अरविंद शिंदे यांनीही निवडणूक आयोगाच्या कामकाजावर प्रश्न उपस्थित केले.
काँग्रेस नेते राहुल गांधी यांनी मतदार यादीतील कथित अनियमिततेबाबत यापूर्वीच प्रश्न उपस्थित केले होते. या प्रकरणाची चौकशी करून मतदारांचा हक्क सुरक्षित ठेवण्याची गरज असल्याचे शिंदे यांनी सांगितले. दरम्यान, निवडणूक आयोगाने SIR संदर्भातील आदेश तिन्ही निवडणूक आयुक्तांच्या मंजुरीनंतरच जारी करण्यात आल्याचे म्हटले आहे.
