आपल्या आवडत्या कलाकारांचे नृत्य आणि मनोरंजनाचे कार्यक्रम पाहण्यासाठी प्रेक्षक दरवर्षी ‘झी मराठी अवॉर्ड्स’ सोहळ्याची आतुरतेने वाट पाहतात. यंदाच्या ‘झी मराठी अवॉर्ड्स २०२६’ मध्ये मराठी मालिकांमधील सात आई एकत्र येऊन खास नृत्य सादर करणार आहेत. या परफॉर्मन्समध्ये सहभागी झालेल्या अभिनेत्री मेघना एरंडे जोशी यांनी या कार्यक्रमातील मजेशीर अनुभव आणि पडद्यामागचे किस्से सांगितले.
या खास परफॉर्मन्समध्ये ‘सनई चौघडे’ मालिकेतील पमा आणि तेजस्विनी, ‘लक्ष्मी निवास’मधील लक्ष्मी, ‘तारिणी’मधील कौशिकी, ‘दीपज्योती’मधील सुलोचना, ‘वीण दोघांतली ही तुटेना’मधील मंदाकिनी आणि ‘कृष्णाईच्या लेकी’मधील सत्यभामा अशा सात अभिनेत्री सहभागी झाल्या होत्या. मेघना यांनी सांगितले की, यापूर्वी सर्वांनी एकत्र नृत्य केले नव्हते. कार्यक्रमासाठी त्यांनी स्टुडिओमध्ये एकदा सराव केला. त्यानंतर प्रत्येकाने आपापल्या मालिकेच्या सेटवर तयारी केली. थेट तांत्रिक सरावाच्या वेळी सर्वजणी पुन्हा भेटल्या. विशेष म्हणजे, कमी सराव करूनही त्यांचा दोन ते तीन मिनिटांचा परफॉर्मन्स उत्तम झाला. प्रेक्षकांनीही त्याला उत्स्फूर्त प्रतिसाद देत पुन्हा सादरीकरण करण्याची मागणी केली.
या कार्यक्रमासाठी सर्व अभिनेत्री पारंपरिक वेशभूषेत सजल्या होत्या. मेघना यांनी अनेक वर्षांनंतर नऊवारी साडी नेसली होती. मात्र, साडी आणि दागिने सांभाळताना त्यांना विशेष काळजी घ्यावी लागली. परफॉर्मन्सदरम्यान स्टेजवर फुटलेल्या बांगड्यांच्या काचा पडल्याचे त्यांच्या लक्षात आले, त्यामुळे कोणाला दुखापत होऊ नये म्हणून त्यांनी तत्परतेने त्या काचा उचलल्या. यामुळे मोठा अपघात टळला, याचे त्यांना समाधान वाटले. कार्यक्रमापूर्वी सर्व अभिनेत्री एकत्र प्रार्थना करत होत्या. तसेच, एकमेकींसोबत फोटो काढणे, रील्स बनवणे आणि गप्पा मारत त्यांनी भरपूर धमाल केली. या अनुभawabaddal आनंद व्यक्त करताना मेघना म्हणाल्या की, सर्वांनी मिळून केलेला हा परफॉर्मन्स आणि प्रेक्षकांकडून मिळालेले प्रेम त्यांच्यासाठी अविस्मरणीय आहे. ‘झी मराठी अवॉर्ड्स २०२६’मधील हा खास कार्यक्रम प्रेक्षकांचे मनोरंजन करणार आहे.
