आता रास्ता न खोदता शोधता येणार भूमिगत वीज वाहिन्यांतील बिघाड

अत्याधुनिक मशीन महावितरणच्या ताफ्यात

लोकवाहिनी न्यूज

नागपूर : नागपूर परिमंडळातील भूमिगत वीज वाहिन्यांमधील बिघाड शोधण्याचे काम अधिक पारदर्शक, अचूक आणि वेगवान करण्यासाठी महावितरणच्या ताफ्यात अत्याधुनिक ‘केबल फॉल्ट डिटेक्शन व्हॅन’ समाविष्ट करण्यात आली आहे. या नवीन वाहनाचा लोकार्पण नागपूर परिमंडळाचे मुख्य अभियंता राजेश नाईक यांच्या हस्ते आज करण्यात आले.

हे वाहन म्हणजे जमिनीखालून गेलेल्या भूमिगत वीज वाहिन्यांमधील दोष शोधणारी एक फिऱती अत्याधुनिक प्रयोगशाला आहे. परिमंडळाच्या विविध भागांत सौंदर्यकरण आणि सुरक्षेच्या दृष्टीने भूमिगत वीज वाहिन्यांचे जाळे वेगाने विस्तारत असून, या वाहिन्यांमधील बिघाड शोधून दुरुस्त करण्याचे मोठे आव्हान महावितरणच्या कर्मचाऱ्यांसमोर असते. या तांत्रिक आव्हानावर मात करण्यासाठी ही नवीन व्हॅन अत्यंत उपयुक्त ठरणार आहे.

सध्या सर्वत्र सुरू असलेल्या विविध विकासकामांच्या खोदकामामुळे किंवा नैसर्गिक कारणांमुळे भूमिगत केबलमध्ये बिघाड झाल्यास संपूर्ण रस्ता, रस्ता दुभाजक किंवा पदपथ खणणे अशक्य आणि त्रासदायक ठरते. अशा वेळी या चाचणी वाहनातील आधुनिक डिजिटल प्रणालीचा वापर करून जमिनीखालील बिघाडाचे नेमके ठिकाण काही मिनिटांतच शोधून काढले जाते. यामुळे तासनतास किंवा दिवसभर बिघाड शोधण्यात जाणारा वेळ वाचणार असून कमीत कमी खोदकामात दुरुस्तीचे काम पूर्ण करता येईल. परिणामी ग्राहकांचा खंडित झालेला वीजपुरवठा तातडीने पूर्ववत करणे शक्य होणार आहे.

उन्हाळ्यातील वाढत्या विजेच्या मागणीमुळे येणारा ताण आणि पावसाळ्याच्या दिवसांत निर्माण होणाऱ्या शॉर्ट सर्किटच्या आपत्कालीन घटनांच्या वेळी ही व्हॅन वीजपुरवठा सुरळीत ठेवण्यात महत्त्वाची भूमिका बजावेल. याशिवाय, एकाच डक्टमध्ये अनेक केबल्स एकत्र असताना त्यातून नेमकी कोणती केबल खराब झाली आहे, हे अचूकपणे ओळखणे या वाहनातील उपकरणामुळे शक्य होणार आहे. या नवीन वाहनाच्या समावेशामुळे नागपूर परिमंडळात ‘केबल फॉल्ट डिटेक्शन व्हॅन’ची संख्या दोन झाली आहे.

या लोकार्पण सोहळ्याला चाचणी विभागाचे अधीक्षक अभियंता वैभव पाथोडे, नागपूर शहर मंडळाचे अधीक्षक अभियंता प्रफुल लांडे, नागपूर ग्रामीण मंडळाचे अधीक्षक अभियंता संजय वाकडे, पायाभूत आराखडा विभागाच्या अधीक्षक अभियंता दीपाजी माडेलवार, नागपूर शहर चाचणी विभागाचे कार्यकारी अभियंता चंदन तल्लारवार, ग्रामीण चाचणी विभागाचे कार्यकारी अभियंता नरेंद्र धवड, सिव्हल लाईन्स विभागाचा कार्यकारी अभियंता धम्मदीप फुलझेले, काँग्रेसनगर विभागाचे कार्यकारी अभियंता राहुल जीवतोडे, अतिरिक्त कार्यकारी अभियंता जीवने आणि उपमुख्य जनसंपर्क अधिकारी योगेश विटनकर यांच्यासह अभियंते, तंत्रज्ञ आणि कर्मचारी मोठ्या संख्येने उपस्थित होते.